Kyivdeki Rusiye elçihanesi ögünde yanvarniñ 25-nde «FIND&FREE» informatsion kampaniyası çerçivesinde «İnsanlarnıñ hırsızlanmasınen bağlı tahqiqatlarnı kim aydınlata» aktsiyası olıp keçti.
Qırım.Aqiqat mühbiriniñ bildirgenine köre, «KrımSOS» cemaat teşebbüsiniñ faalleri Rusiyeden işğal etilgen Qırımda insanlarnıñ ğayıp olmasını tahqiq etmesini 31-inci kere talap ete.
Aktsiya vaqtında faaller elçihane ögünde ğayıp olğan qırımlılarnıñ adları ile levhalarnen bir sırağa tizildi. Olarnıñ ögünde qandillernen advokat ve faaller yürdi. «KrımSOS» uquqçısı Denis Savçenkonıñ bildirgenine köre, olar ğayıp olğanlarnıñ taqdirinen meraqlanğanını köstermege istedi.
«Aktsiya «İnsanlarnıñ hırsızlanmasınen bağlı tahqiqatlarnı kim aydınlata» dep adlandırıla. Laf insanlarnıñ hırsızlanmasınen bağlı tahqiqatlarnı devam ettirmek ve yañı malümat almaq içün özüni telükege oğratqan, belki be, yekâne alet olğan advokat ve faaller aqqında kete», – dep añlattı Savçenko.
Rusiye elçihanesiniñ vekilleri faallerge çıqmadı.
Qırım ilhaqından soñ, yarımadada hususan qırımtatarları ğayıp olıp başladı. Bu arada Rusiye nezaretindeki Qırım Tahqiqat Komiteti «yarımadada qırımtatarları kütleviy bir şekilde ğayıp olmay» dey.
Faallerniñ malümatına köre, Rusiye Qırımnı ilhaq etken soñ, Qırımnıñ 44 sakini coyulğan, 15-i aqqında alâ daa iç bir malümat yoq.
