İnguşetiyada martnıñ 26-nda olıp keçken narazılıq mitinginiñ daa bir iştirakçisi tutuldı, dep bildire Azatlıq Radiosınıñ rus bürosı.
Tutulğan Mussa Pliyev kütleviy qalabalıqlarnı teşkil etkeninden şübheli sayıla, dep tarif etti «MBH media» Rusiye portalına adliyeci Kaloy Ahilgov. O, Pliyevniñ bulunğan yerini tam olaraq bilmey. Ahilgovnıñ fikirince, tutulğan kişini Rusiye FSBsiniñ idaresi yerleşken Magasqa alıp ketmeleri mümkün.
Pliyevniñ evinde tintüv keçirildi. Ahilgovnıñ fikirince, faal memuriy ceza ala ya da cinaiy taqipke oğray bile.
Keçken afta Nalçikniñ (Kabardin-Balkar paytahtı) şeer mahkemesi İnguşetiyalı sekiz faalni SİZOğa qapattı. Olarnı akimiyet vekiline qarşı zorbalıq qullanğanından ve İnguşetiyada olğan narazılıqlarda qalabalıqlarğa çağırğanından şübheli sayalar.
Eki cinaiy iş bir tahqiqatqa birleştirildi. Politsiya hadimlerine qarşı zorbalıq qullanuvı ve qalabalıqlarğa çağıruv içün eñ büyük ceza 10 yıl apis cezası ola.
Sentâbrniñ 26-nda İnguşetiya ve Çeçenistan reberleri Yunus-Bek Yevkurov ve Ramzan Kadırov regionlar arasındaki memuriy sıñır pekitilmesine dair añlaşma imzalağan ediler. Oña binaen, Çeçenistan İnguşetiyanıñ Sunjen rayonınıñ bir qısmını ala.
Vesiqanıñ imzalanması İnguşetiyada narazılıq aktsiyalarınıñ sebebi oldı.
