İnguşetiyada din erbabı İbragim Belharoyev öldürildi. Kimligi belli olmağan insanlar dekabrniñ 31-ne keçer gecesi maşinasına ateş açtı. «Kavkazskiy üzel» neşiriniñ malümatına köre, Belharoyevniñ aydavcısı reanimatsiyada buluna.
Kavkaz.Realii bildirgenine köre, öldürilgen din erbabınıñ evi yanında onıñ izdeşleri toplaşa. Yerli sakinlerniñ malümatına köre, Belharoyevniñ öldürilmesi onıñ akimiyet ile zıddiyetinen bağlı.
Belharoyevge yapılğan ücüm – ilk degildir. 2016 senesi mayıs ayında uquq qoruyıcı organlarındaki menbalar, Belharoyevniñ maşinası Nazrandeki evi yanında patlatıldı, dep haber etti. Adise neticesinde kimse yaralanmadı. Soñra iç işler nazirligi, maşina patlatılmadı, amma yaqıldı, dep bildirdi. 2017 senesi oktâbr ayında Magas rayon mahkemesi İnguşetiya sakinini Belharoyevniñ maşinasını patlatqanında qabaatlı dep tanıdı. Onı 3,5 yıl koloniyada qalmasına üküm etkenler.
İbragim Belharoyev – XIX – XX asırnıñ başında İnguşetiyada islâm aqımlarından biriniñ yolbaşçısı olğan şeyh Batal-haci Belharoyevniñ torunıdır. Erbabnıñ özü ise diniy tasil almağan ve şeyh olmağan edi. Onıñ soy-sopları arasında – Batal-haci Belharoyevniñ torunları diniy aqımınıñ aqsaqalı, 2017 senesi oktâbrniñ 7-nde vefat etken Sultan Belharoyev ve cumhuriyet parlamentiniñ deputatı Ahmed Belharoyev.
