Boeing 737 MAX yolcu uçağı oktâbrniñ 29-nda Sumatra adasınıñ yaqınlarında deñizge tüşti, dep bildire İndoneziya akimiyeti. Bu malümatqa köre, Lion Air ava şirketiniñ uçağı paytaht Cakartadan Pangkal-Pinang şeerine sefer kerçekleştire edi. Uçaqta eñ az 188 insan bar edi.
Sağ qalğanlar aqqında malümat şimdilik yoq.
Ava şirketi, vaziyetni izaatlamayıp, «bütün malümatnı toplamağa» tırışqanını bildirdi.
Boeing 737 MAX – yaqarlıq qullanmasınıñ eñ eyi semereligi ile belli «Boeing» uçağınıñ yañartılğan versiyasıdır. Bu uçaqlar 2017 senesi qullanılmağa başladı. Bu qaza ilk ola. Boeing şirketi, İndoneziyade yüz bergen qaza aqqında haberi bar olğanını ve «vaziyetni taqip etkenini» bildirdi.
İndoneziyada 17 biñ ada bar ve iç seferlerde uçaqlar qullanıla. Soñki yılları memlekette bir qaç uçaq qazası olğan edi.
Sentâbrniñ 28-nde İndoneziyada 7,5 büyükliginde yer teprenüvi yüz berdi. 350 biñ insan yaşağan Palu şeerini altı metrlik tsunami dalğası qapladı. Qızıl Haç malümatına köre, afattan sebep umumen 1,6 million insan zarar kördi.
