İndoneziyada yüz bergen zelzele ve tsunami qurbanlarınıñ sayısı 1200-den ziyade oldı. Bu aqta The Straits Times haber ete.
Tabiat afatı sentâbrniñ 28-nde saba yüz berdi. Şu künü Sulavesi adasındaki Palu şeeriniñ yaqınlarında 7,5 ballğa qadar eki yeraltı sarsıntı oldı.
Soñra Paluda eki metrlik tsunami oldı. Oktâbrniñ 1-nde saba aynı rayonda yüz bergen 5,5 balllı yer teprenüvi aqqında haber etildi.
İndoneziya prezidenti Coko Vidodo afat aqibetlerini yeñmek içün halqara yardımnı qabul etmege azır olğanını aydınlattı. O, büyük parçalarnı taşıycaq ağır tehnikağa ihtiyac bar olğanını bildirdi. Avropa Birligi İndoneziyağa 1,5 million euro acele gumanitar yardım olaraq berdi.
Felâket aqibetinde yerli ava limanı aqsap-aqsap çalışa, elektrik ağlarınıñ ekseriyeti bozuldı, yollar viran oldı.
Televideniyede Palu videoları kösterildi. Anda bina, maşina ve terekler büyük parça obalarına çevirildi.
İndoneziyanıñ gidrometeorologik agentligi sentâbrniñ 29-nda tenqit etildi, çünki ocağı deñizde olğan yer teprenüvinden soñ tsunami aqqında haber etip, birazdan bu malümatnı lâğu etti. Akimiyetniñ fikirince, dalğalar yalığa kelgende tenbi daa bar edi, insanlar ise tahliye olamadı.
