Apiske alınğan qırımtatar faali Edem Bekirovnıñ advokatı Aleksey Ladinniñ müvekkiliniñ SİZO №1 tibbiy bölüginden şeer hastahanelerinden birine çıqarılğanından haberi yoq. İyülniñ 15-nde bir sıra kütleviy haber vastası Rusiye ombudsmeni Tatyana Moskalkovanıñ böyle malümatını aydınlatqan edi. Ladin, Qırım.Aqiqatqa izaat berdi.
«İmayeniñ Edem Bekirovnıñ SİZO tibbiy bölüginden şeer hastahanelerinden birine baqınuv ve tedaviylev içün çıqarılmasına dair er angi malümatı şimdilik yoq. Bundan da ğayrı, imaye, yaqın vaqıtta Bekirovnı Avropa insan aqları mahkemesi talap etkeni kibi hastahanege mustaqil ekimler tarafından baqılması içün çıqaracaqlarından şübhelene. Böyle hulâsa Aqmescit SİZOsındaki №3 tibbiy bölük ekimleriniñ Bekirov baqtırıldı, böylece Avropa insan aqları mahkemesiniñ talabı yerine ketirilgenine dair aytqanları esasında çıqarıldı», – dedi Ladin.
Bir sıra kütleviy haber vastası qırımtatar faali Edem Bekirov Aqmescit SİZOsından hastahanege avuştırıldı, dep bildirdi. Haber etilgeni kibi, bunı Rusiye ombudsmeni Tatyana Moskalkova Kyiv Podol rayon mahkemesinde jurnalistlerge ayttı.
Rusiye ombudsmeni Tatyana Moskalkova Qırım.Aqiqat mühbirine izaat berip, Kreml kontrolindeki Aqmescit Kiyev rayon mahkemesi apiske alınğan qırımtatar faali Edem Bekirov içün sıñırlav tedbirini Aqmescit SİZOsında tutuv yerine ev apsini belgilemesini «ister edi», dep ayttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
