Advokat Nazim Şeyhmambetov Aqmescit sakini Denis Kaşuknıñ apiske alınmasına qarşı istinaf şikâyetini bermege niyetlene. Bu aqta o, Qırım.Aqiqatqa tarif etti.
«Şübhesiz, Kiyev rayon mahkemesiniñ qararını eñ qısqa vaqıtta şikâyet etecekmiz. Bazarertesi künü (dekabrniñ 23-nde – QA) yollarmız, dep tüşünem», – dep ayttı advokat.
Onıñ bildirgenine köre, müvekkiliniñ ruhiy alı pek ağır.
«Menim tecribemde böyle müvekkilim birinci ola. İnsan pek telâşlı edi, er vaqıt tekrarlay edi: «Er şey güzel, özüni baqıñız, er şey güzel». Bu mantra kibi kele edi. Mahkeme oturışuvınıñ başında mahkeme qapalı olmasını istedi. Bu saçma bir şey. Bir qaç künden berli qorantasını körmegen ve böyle bir şey yaşağan insan oturışuv qapalı olsun, yaqın tuvğanları, kütleviy haber vastaları ve digerleri iştirak etmesin istedi. Mence, o, pek ağır ruhiy alda buluna, bunıñ sebeplerini tek tahmin ete bilem. Ümüt etem ki, onı qorup olurmız», – dep qayd etti Şeyhmambetov.
Kaşuknı Qırımdaki Rusiye FSBsiniñ idaresinde ziyaret etken advokat İslâm Velilâyevniñ fikirince, qapalı mahkeme muracaatını berüv qararı apiske alınğan qırımlığa zorlap qabul ettirildi.
«Onıñ qararı olmağanını tüşünem. Bunı FSB hadimleri oña tevsiye etti. Bugün ve tünevin oña kirgende körgenlerimni maneviy basqı dep adlandırmaq mümkün. Gipnoz kibi», – dedi Velilâyev.
Rusiye kontrolindeki Aqmescitniñ Kiyev rayon mahkemesi dekabrniñ 20-nde Aqmescit sakini Denis Kaşuknıñ sıñırlav tedbirini belgilep, onı 2020 senesi fevralniñ 18-ne qadar SİZOğa aldı.
Advokat Nazim Şeyhmambetov, Rusiye FSBsi Aqmescit sakini Denis Kaşuknı silâ satın alğanından ve saqlağanından şübheli sayıp tuttı. Denis Kaşuknıñ ömür arqadaşı Olga Qırım.Aqiqatqa izaat berip, dekabrniñ 17-nden berli bağda olmağanını ve evlerinde tintüv keçirilgenini bildirdi.
Advokat Nazim Şeyhmambetov, FSB Kaşuknı eki madde – Rusiye Ceza kodeksiniñ 222-nci ve 222.1-incisine istinaden («qanunsız satın aluv, satış, saqlap, silâ, onıñ esas parçalarınıñ taşıması») – şübheli saya, dep bildirdi.
Rusiye FSBsi Denis Kaşuknıñ tutuluvını şimdilik izaatlamadı.
