Aprelniñ 27-sinde Aluşta "Hizb ut-Tahrir davası" iştirakcileriniñ imayesi Rostov-na-Donu şeeriniñ Cenübiy bölge arbiy mahkemesine bir sıra muracaatname berdi, olarnıñ arasında "cinayet adisesiniñ olmaması" sebebinden bu cinaiy davanıñ qapatılması aqqında muracaatname de bar.
Bunı "Qırım birdemligi" birleşmesine advokat Ayder Azamatov ayttı.
Onıñ malümatına köre, imayeciler ve şübeliler oturışta video vastası ile iştirak etti.
"İmaye tarafı qabul etilmez delillerniñ çıqarılmaması, davanıñ prokurorğa qaytarılması ve umumen cinayet adisesi olmaması sebebinden davanıñ toqtatılması içün bir sıra muracaatname berdi. Men de Kantemirovğa ait bir muracaatname berdim, oña köre daa evel tahqiqatçınıñ muracaatnamesine köre apis etilgen mülkniñ boşatılmalıdır", - dedi Azamatov.
O qoştı ki, mahkeme imayecilerniñ muracaatnamelerini diñlep, muşavere odasına ketti. Mahkeme qararı aprelniñ 28-inde ilân etilecek.
Fevralniñ 3-nde Rusiye kontrolindeki Aqmescitniñ Kiyev rayon mahkemesi Aluştadaki «Hizb ut-Tahrir davası» mabüsleriniñ apis müddetini uzattı.
Rusiye quvetçileri qırımlılarnı iyünniñ 10-nda olğan tintüvlerden soñ tutıp aldı. Rusiye FSBsi tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) aıçlğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
