Link açıqlığı

Saatnıñ esas haberi

İmaye, ekstremizmde qabaatlanğan qırımlı Ramazanovğa qarşı davanı qapatmağa rica ete


İsmail Ramazanov
İsmail Ramazanov

«Agora» halqara aq qorçalayıcı gruppasınıñ advokatı Aleksey Ladin Qırımdaki Rusiye Tahqiqat komitetine muracaat yollap, Rusiye Ceza kodeksiniñ 282-nci maddesine istinaden Zello internet ratsiyası üzerinden nefret ve duşmanlıq doğurğanında qabaatlanğan İsmail Ramazanovğa qarşı cinaiy davanı toqtatmağa rica etti. Bu aqta advokat Qırım.Aqiqat mühbirine bildirdi.

İmaye, bergen muracaatında 2018 senesi dekabr ayınıñ soñunda Devlet duması tarafından qabul etilgen Rusiye Ceza kodeksiniñ 282-nci maddesiniñ qısmen yımşatılması qanunına esaslana.

«Bu qanunğa köre, bir de bir şahıs bir yıl içinde bunıñ kibi areketler içün memuriy mesüliyetke çekilgen olsa, cinaiy mesüliyetke çekilmesi mümkün. Bundan evel Ramazanov ekstremist davaları boyunca memuriy mesüliyetke çekilmegen edi», – dep aytıla muracaat metninde.

İmaye, Ramazanovnı ekstremist ve terroristler cedvelinden çıqartmaq içün tahqiqattan Rosfinmonitoringge ariza yollamasını rica ete.

«İsmail Ramazanovğa qarşı 282-nci maddege istinaden yapılğan cinaiy taqip vaqtında oña silâ saqlağanı içün de cinaiy iş açıldı. İmaye başından berli uquq qoruyıcılarnıñ silâsı olğan Makarov pıştavınıñ patronları İsmailge tintüv vaqtında qoyuldı, dep bildirgen edi. İlk tahqiqat devamında bu dava qapatıldı, çünki İsmailniñ cinayet ile alâqası yoq edi. 282-nci maddege istinaden cinaiy dava qapatılmasınen bağlı muracaat qanaatlendirilse, İsmailniñ bir qabaatı qalmaycaq. Nasıl da olsa, hatırlatayım ki, o, altı ay SİZOda qaldı, çünki ay-aydan sıñırlav tedbiri sebepsiz uzatılğan edi», – dep tarif etti Aleksey Ladin.

İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.

İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.

Avgustnıñ 2-nde belli oldı ki, Ramazanovğa qarşı cinaiy iş qoşma tahqiqatqa qaytarıldı.

XS
SM
MD
LG