Rusiye uquq qoruyıcıları adiy urbada olıp, faal, Sudaq regional Meclisiniñ reisi İlver Ametovnıñ eski silâ ev müzeyinde tintüv keçirdi, dep haber ete «Qırım birdemligi».
Qayd etilgenine köre, adise fevralniñ 22-nde oldı – o künü aqşam oña telefon etip, ev müzeyi olğan evge kelmege rica etkenler.
Anda onı polis ve adiy urbada insanlar bekley edi. «Baqacaqlar» dep vesiqalar köstergenler. Uquq qoruyıcılar bildirgenine köre, «qanunsız şeyler» qıdırıldı. Tintüv tahminen beş saat devam etti, soñra bir qaç demir parçasını ekspertizağa alğanlar, dep haber ete «Qırım birdemligi».
«Mında «limonkalarım» [piyadege qarşı el granatası], patronlar bar, amma boş. Olarnı çoqtan boşalttım», – dedi Ametov.
Qırımtatarınıñ fikirince, onı cemaat faaliyeti ve regional Meclis reisi olğanı içün taqip eteler.
«Bir şeyden vazgeçmeycem. Halq meni sayladı. Halq kerekmeysiñ dese, şu künü keterim», – dep qayd etti o.
İlver Ametov – qırımtatar milliy areketiniñ faali, Sudaq regional meclisiniñ reisidir. 2019 senesi keçirilgen tintüv vaqtında siyasetçiniñ ev müzeyinden eskiy silâ eksponatlarını musadere etilgen edi. O, 20 yıldan berli artefakt toplay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
