Mekkede acılıq başlandı. O, avgustnıñ 2-ne qadar devam etecek. Saudiy Arabistan qurulğan 1932 senesinden berli koronavirus pandemiyası sebebinden ilk sefer acılıqta çetelden kelgen musulmanlar yoq. Bu aqta Azatlıq Radiosı bildire.
Er yıl Mekkege eki milliondan çoq acı kele. Faqat bu sene tek 10 biñge qadar insan iştirak etecek. Esasen yerli eali. 65 yaşından büyük ve hronik hastalığı olğan insanlarnı acılıqqa almaylar.
Kelgenler koronavirus testini bermeli ve Kâbe etrafındaki meydanda olğan mahsus işaretlerge köre mesafe qorumalı. Bu sene Kâbeni tiymek yasaq etilgen. Acılar evge qaytqan soñ eki afta karantinde qalacaq.
Soñki malümatqa köre, COVID-19 pandemiyası başlağanından berli Saudiy Arabistanda 270 biñ koronavirus hastası qayd etildi. Tahminen 230 biñ insan tüzeldi. Aman-aman üç biñ hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
