Rusiyeniñ keniş mıqyaslı istilâsı başlanğandan berli ilk sekiz çetel gemisi zahire yüklemek içün Ukrayina limanlarına kirdi. Bu Ukrayina Deñiz Quvetleri haber etti.
Zahire Dunay-Qara deñiz beketiniñ özen limanları vastası ile alıp çıqarılacaq. Bütün yük gemileri telükesizlik ceetinden arbiy gemiler taarfından refaqat etilecek. Kıyivniñ malümatına köre, bu, Ukrayinanıñ Yılan adasını nezareti altına qaytarıp olması sayesinde mümkün oldı.
BMT Dunay-Qara deñiz beketi ile zahire ihracınıñ müim olğanını, lâkin dünya açlığını toqtatmaq içün yeterli olmağanını bildirdi.
Kıyiv ve Ğapr memleketleri Rusiyeni Azaq deñizindeki Ukrayina deñiz limanlarını zapt etmesinde qabaatlaylar. Yılan adasınıñ azat etilmesi Ukrayinağa Qara deñiz üzerinde yerustü ve ava vaziyetini nezaret etmege imkân bere.
Ukrayina akimiyeti Rusiyeni işğal etilgen topraqlarda ukrayin zahiresini qanunsız elge keçirgeninde qabaatlay. Rusiye akimiyeti ukrayin zahiresini Rusiye ve işğal etilgen Qırımğa çıqarğanını taslıqlay.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
