Ukrayina prezidentiniñ Qırım Muhtar Cumhuriyetindeki Daimiy temsilcisiniñ muavini Denis Çistikov, Ukrayina vatandaşlarınıñ vaziyeti İşğal etilgen Qırım yarımadasında siyasiy taqip ve Rusiye akimiyeti tarafından qanunsız tutulmalar sebebinden vaziyet kerginleşe, dep bildirdi. Bu aqta Qırım.Aqiqat mühbiri haber ete.
Bu aqta Çistikov Kıyivde Ukrayina prezidentiniñ Qırım Muhtar Cumhuriyetindeki temsilciliginiñ er yıllıq matbuat konferentsiyasında çıqışta bulunıp ayttı.
Onıñ aytqanına köre, 2024 senesi dekabr ayına qadar siyasiy mabüslerniñ umumiy sayısı 218 kişi, olardan 132 qırımtatardır. 40-tan ziyade qırımlı siyasiy mabüs qanunsız sürgün etildi, amma kerçekten de Rusiye territoriyasındaki penitentsiar müessiselerine sürgün etildi.
2024 senesiniñ başından başlap işğalciler eñ azından 12 siyasiy mabüsni Qırımdan Rusiye territoriyasındaki apishanelerge qanunsız sürette avuştırdı, eñ azından 20 siyasiy mabüs Rusiye apishanelerinden Rusiyeniñ uzaq regionlarına qanunsız sürette avuştırıldı. Sağlıq hızmetiniñ kösterilmesinde muntazam red etilüvi ciddiy bozuv ve basqı aletlerinden biri olıp qala. 60 qırımlı siyasiy mabüs acele tibbiy yardımğa muhtac.
"2022 senesi fevralniñ 24-nden soñ Rusiyede "Rusiye ordusınıñ itibardan tüşürilmesi" içün memuriy mesüliyet belgilendi. 2024 senesi noyabr ayınıñ soñunda Qırımda temsilcilik tarafından RF Memuriy cinayetler kodeksiniñ 20.3.3 maddesine istinaden işğal etilgen Qırımdaki "mahkemelerge" 1093 malümat kelgeni qayd etildi. Olardan 955-inde memuriy ceza şeklinde para cezası berilmesi ya da başqa bir madde boyunca başqa bir işke qoşulması aqqında qarar çıqarıldı", — dep tarif etti Denis Çistikov.
Ukrayina prezidentiniñ Qırım Muhtar Cumhuriyetindeki temsilcisi vazifelerini vaqtınca eda etken Ölğa Kurişko müessise faaliyetiniñ esas irişmeleri ve yönelişlerini qayd etti. O, Qırım aqqında daa çoq aytmağa, işğalcilerniñ cinayetlerini ve ilhaq etilgen yarımadada qarşılıq areketiniñ faaliyetini aydınlatmağa çağırdı.
Temsilcilikniñ esabat tedbiri ukrayin ve ecnebiy jurnalistlerniñ iştiragi ile keçti.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
