Ukrayina prezidenti Ofisiniñ yolbaşçısı Andriy Yermak, Ukrayina içün telükesizlik kefaletleri aqqında añlaşma boyunca ABD ile üçünci muzakerelerni keçirdi. Taraflar, hususan, müim ilerilevni qayd ettiler, dep bildire OPU matbuat hızmeti.
Yermaknıñ aytqanına köre, "Ukrayinağa ABD tarafından berilgen 61 milliard dollarlıq yardımnıñ qabul etilmesi muzakerelerni bayağı tezleştirdi". OPU yolbaşçısı añlaşma "yaqın vaqıtta" imzalana bilecegini qayd etti.
"Taraflar añlaşma leyhasınıñ metnini muzakere ettiler, vesiqanıñ esas maddelerine köre müim ilerilevni qayd ettiler ve ilerideki areketlerniñ algoritmini tüzettiler", – dep añlattılar OPU-da.
OPU yolbaşçısı şunı da qoştı ki, "añlaşma Ukrayina ve ABD mudafaa saasında uzun müddetli işbirligi içün temel qoyacaq".
"Yedi gruppası" memleketleri tarafından 2023 senesi iyül ayında Vilnüste qabul etilgen Ukrayinağa qol tutuv beyannamesi çerçivesinde yedi telükesizlik añlaşması endi Büyük Britaniya, Almaniya, Frenkistan, Danimarka, Kanada, İtaliya ve Felemenk ile imzalandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
