Fevralniñ 27-nde Suriyeniñ şimal-ğarbinde prezident Başar Asad quvetleriniñ ücümi neticesinde, soñki malümatqa köre, eñ az 33 türk askeri elâk oldı, 36-sı yaralandı. Bu aqta Hatay türk vilâyetiniñ valisi Rahmi Doğan bildirdi.
Laf Suriyede 9 yıl devam etken cenk vaqtında bir künde eñ büyük can ğaybı aqqında kete. Cumaaqşamı aqşam üstü Türkiye prezidenti Recep Tayyip Erdoğan memleketniñ Telükesizlik Şurasını topladı. Anda Asadnıñ ordusına qarşı avadan ve qaradan darbe endirmege qarar alındı, dep bildire Azatlıq Radiosı.
ABD NATO elçisi Key Beyli Hatçison Washingtondaki matbuat konferentsiyasında Asad ordusınıñ ücümlerine oğrağan Türkiyege qoltuta, dep bildirdi, dep haber ete «Ukrinform». «Elbette, Rusiye desteklegen Asad quvetlerinden insanlarını qorçalağan Türkiyege qoltutamız. Mında bir sual yoq», – dep qayd etti Hatçison.
Suriye insan aqları observatoriyası, Rusiye desteklegen Suriye ükümet quvetleri muhalifet küçlerine qarşı yañı ücüm areketlerinden soñ İdlib vilâyetiniñ cenübini kontrol altına aldı, dep bildirdi.
Soñki aftaları Suriye prezidenti Başar Asadnıñ ordusı Rusiyeden destek alıp, memlekette kontrol etmegen soñki isyancı anklavını yoq etmek içün ücüm etti. Böyle etip İdlib vilâyetiniñ cenübinde ve qomşu Aleppo vilâyetinde topraqlarnı zapt etti.
Türkiye, muhalifetke yardım etmek içün Asadnıñ ücümine cevap olaraq İdlibte askerleriniñ sayısını arttırdı. Türkiye ordusınıñ yardımınen silâlı muhalifetniñ ğalebeleri aqqında haber etile. Berilgen malümatqa köre, olar İdlib vilâyetindeki Sarakib şeerini kontrol altında aldı ve Aleppodan Dimaşqqa yolnı qapattı.
Asad ordusınıñ ücümi büyük qaçaq dalğasına yol açtı: BM malümatına köre, dekabrniñ soñundan başlap yarısından çoq bala olğan tahminen 900 biñ kişi evlerini ya da muvaqqat sığınaqlarnı terk etmege mecbur olıp, suvuq qışta evsiz qaldı.
