NASA Firms hızmeti uydu resimlerinde Kurortnıy şeerindeki "Ğarbiy-Qırım" elektrik stansiyasında ve ilhaq etilgen Qırımnıñ ğarbındaki Saq şeerindeki elektrik stansiyası ve demiryol stansiyası territoriyasında yanğınlarnı qayd ete. Bundan da ğayrı, Keriç civarındaki Azaq deñizinde belgisiz obyektler yanmaqta, buña "Krımskiy veter" ve "Exilenova+" telegram kanalları diqqat ayırdı.
"Exilenova+" yazğanına köre, NASA Firms sisteması Keriçten şimalde kurortlı Saq şeerinde yanğınlarnı qayd ete, anda gemilerge ücüm etilgen ola bile.
"Krımskiy veter" yerli sakinlerge atıf eterek, Oraqnıñ 7-nde gece Kefe, Keriç, Saq ve İçki rayonlarında patlav ve atışlar eşitildi, dep yaza.
İçtimaiy ağlardaki malümatqa köre, ücüm altında Saki demiryol stansiyası, "Saki" ve "Ğarbiy-Qırım" elektrik stansiyaları ola bile, bundan ğayrı, keçken gece Ukrayin dronları tarafından ücüm etilgen benzinli tankerler yanmağa devam ete.
Rusiye ve Ukrayina arbiyleriniñ tefsirleri şimdilik yoq.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.