Mayısnıñ 21-nde saat 11:00-de Rusiye quvetçileri İçki qasabasında qırımtatar Müslim Zevriyevniñ evinde tintüv keçirdi.
Bunı Qırım.Aqiqatqa «Qırım birdemligi» cemaat birleşmesi haber etti.
Zevriyevniñ aytıp bergenine köre, tintüv Rusiye Ceza qanunnamesiniñ 205.5 maddesi çerçivesinde evinde, muvaqqat evçikte, garajda keçirilgen.
«On kişi edi. Olardan eki kazak ve eki şaat. Kompyüter, telefon, fleşka, bir qaç kitap, qayd defterleri, arap tilinden defter tutıp alındı», – dedi o.
Protokollar quvetçiler qaldırmağanlar, amma tekrar kele bileler, dep aytqanlar.
Rusiye qanun qoruyıcı organlarınıñ tefsirleri de yoq.
Mayısnıñ 19-nda, saba «Qırım birdemligi» cemaat birleşmesiniñ mühbiri Zidan Acikelâmovğa «tahqiqat tedbirleri» ile bir qaç polis ve FSB hadimi keldi.
Qırımnıñ Aqmescit rayonında mayısnıñ 11-nde Rusiye quvetçileri Özbekistan vatandaşı Nabi (Ayub) Rahimovnı tintüv vaqtında atıp öldürdi. Resmiy versiyağa köre, erkek «qıdıruvğa ilân etilgen halqara terror teşkilâtınıñ azası olıp», FSB hadimlerine qarşı ateş açtı.
Mayısnıñ 12-nde Rusiye nezaretinde olğan İçki rayon mahkemesi, mayısnıñ 11-nde Rusiye quvetçileri tarafından atıp öldürilgen Özbekistan vatandaşı Nabi (Ayuba) Rahimovnıñ apayını Sohiba Burhanovanıñ memleketten çıqarımasına qarar berdi.
