Qırımda mudafaa yapılarını qurmağa qarar esaslıdır, dep bildirdi Qırımnıñ işğal yolbaşçısı Sergey Aksönov. Onıñ sözlerine köre, Ukrayina ordusına emiyet bermemek mümkün degil, lâkin Rusiye akimiyeti olması mümkün qarşı ücümge azırdır ve "iç bir felâket olmaycaq".
"Qırımda ve yarımadanıñ öglerinde mudafaa yapılarını qurmaq qararnı doğru ve esaslı olğanını sayam. Bu, mıtlaqa maqsadına köre qullanılacağı demek degil. Biz vaqialarnıñ er angi inkişafına azır olmalımız ve biz bunı yaptıq", - dei yazdı o.
O, Rusiye ordusı "teren eşelon mudafaasını" qurğanını ve yarımadanıñ mudafaası içün yeterli qadar quvetlerniñ olğanını qayd etti.
Satellit resimleri Qırımnıñ şimalinde «Ermeni Bazar» ve Perekop Rusiye keçiş noqtaları rayonında çift okop yolağı bar, dep köstere. Satellit fotoresimleri E-105 yolunıñ eki tarafında da ve Sivaş gölü yanında yañı fortifikatsion inşaatlarnı kösterdi.
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayina prezidenti ofisiniñ yolbaşçı muavini İgor Jovkva Qırım.Aqiqatqa intervyü berip, Ukrayinanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kıyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayinanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayina arbiy istihbarat yolbaşçısı Kırılo Budanov Ukrayina Qırımnı em küç, em diplomatiyanen keri alacaq, dep bildirdi.
Ukrayina Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayina Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
