Qırım işğaliniñ 11 yılı devamında 385 insan siyasiy sebeplerden cinaiy taqipke oğradı, 240-ı apiste buluna, dep bildire Qırımtatar resurs merkeziniñ kommunikatsiyalar meneceri Tatyana Savçuk.
"Qırım ve Ukrayinanıñ diger işğal etilgen topraqlarınıñ sakinleri milliy ve diniy alâmetlerge köre ayırımğa oğratıla. Bunıñ içün ukrayin cemiyetine cenk 2022 senesi degil de, Qırım işğal etilgen 2014 senesi başlağanını hatırlatmaq kerek", — dep ayttı o, Qırım işğaline qarşılıq Künü arfesinde.
Cemiyetniñ işğal etilgen yarımada içün küreşni ne içün alıp barmaq kerek olğanını añlaması da müimdir, dedi QRM-niñ idare reisi Eskender Bariyev.
"Bizler bu küreşni endi 11 yıldan berli devam etemiz, bizim içün ukrayin cemiyetiniñ birleşmesi pek müimdir, ukrayin cemiyetine Qırım Ukrayinanıñ bir parçası olğanını añlatmaq kerek. Qırım içün küreşkenimizde, Ukrayinanıñ topraq bütünligi, Ukrayina suvereniteti içün küreşemiz", — dep qoştı o.
Qırım işğaline qarşılıq künü — fevralniñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüvniñ esas epizodlarından biri oldı.
2020 senesi Ukrayina prezidenti öz fermanınen fevralniñ 26-nı Qırım Muhtar Cumhuriyeti ve Aqyar şeeriniñ işğaline qarşılıq kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
