Aq-uquq qoruyıcılar oña ekinci Volodımr Baluh deyler – Saqtan Qırım faali Oleg Prıhodko ukrain tarafdarı olğanını gizlemeyip, yarımadanıñ işğalini tanımay ve Rusiye paportını mecburiy aldırtqanlarını ayta.
2019 senesi fevral ayında Qırımdaki Rusiye FSB-si Prıhodkonıñ evinde tintüv keçirdi. Quvetçilerniñ kelmesiniñ formal sebebi, Prıhodko sovet askerlerniñ abidesine svastika resmini yapması oldı. İşğalciler ukrain timsalâtını, tehnika ve CD-disklerni tutıp aldı. Tintüvden soñ faalni Aqmescitke alıp kettiler, anda sorğuğa çektiler. O zaman oña "faşist timsalâtınıñ propagandası içün" 2000 ruble para cezasını bergen ediler.
Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatladılar. Ukrain faali öz qabaatını tanımay.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Martnıñ 3-nde Rostov-na-Donudaki Cenübiy arbiy bölgesiniñ mahkemesi Qırımdan ukrain tarafdarı faali Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlı tanıdı ve 5 yıl sert apis cezasına mahküm etti.
«Mahkemeniñ ükmüne binaen, mahkemelengen qabaatlı tanıldı, o 5 yıl sert apis cezasına mahküm etildi ve 110 biñ ruble para cezasınen 1 yıl apishanede cezasını çekecek», – TASS agentligine mahkeme vekili haber etti.
(Fotogalereya ilk sefer 2020 senesi noyabrniñ 21-nde taqdim etilgen edi)
Facebook Forum