Link açıqlığı

Saatnıñ esas haberi

İşğal vaqtında Qırımğa pek çoq rus siyasetçisi keldi – Ukraina ADQ sabıq başı


Sergiy Gayduk
Sergiy Gayduk

2014 senesi mart ayında Ukraina Arbiy deñiz quvetleriniñ başı vazifesine tayin etilgen vitse-admiral Sergiy Gayduk, yarımadağa işğal zamanı kelgen çoq sayıda rus siyasetçisi aqqında ayttı.

Bu aqta o, Qırım.Aqiqatqa bildirdi.

«O zaman ukrain siyasetçilerinden farqlı olaraq pek çoq sayıda rus siyasetçisi Qırımğa keldi. Olarnıñ arasında Putinniñ yardımcıları (2014 senesi Qırımğa Rusiye Devlet dumasınıñ SNG meselelerinden reisi Leonid Slutskiy kelgen edi ‒ QA), Rusiye Devlet dumasınıñ bir çoq deputatı (Konstantin Malofeyev, Nikolay Valuyev, Valentina Tereşkova, Aleksandr VasilyevQA) bar edi», – dep qayd etti o.

Gayduknıñ aytqanına köre, o zaman Qırımda neler olğanını añlamaq içün bazılarınen körüşmege mecbur olğan edi.

«Açıq aytacaq olsam, men bu şeyler aqqında iç bir kimsenen kelişmedim, amma niyetim böyle edi: Qırımda menim etrafımda neler olğanını añlamaq kerek edim. Şübesiz: Aksönovnen körüşmeycegim dedim, çünki o 90-ncı senelerniñ aydutı. Belli ki, Çalıy, Vitko artında belli bir küçler bar, Qırım MC reberligi, Rusiye SQ reberligi. Eñ azından bu körüşüvler Qırımda eki reberlik seviyesi tizilgenini añlamağa yardım etti: siyasiy ve arbiy», – aytıp berdi o.

Gayduk dey ki, er birisiniñ öz vazifesi bar edi: «arbiyler arbiy işlernen, siyasetçiler siyasetnen oğraşa ediler».

Tafsilâtlıca Qırım.Aqiqatnıñ saytında oquñız.

Amerikanıñ Devlet kâtibi Entoni Blinken, ABD Rusiyeni Qırımnıñ işğalini toqtatmağa çağırğanını bildirdi.

Kreml ABD prezidenti Joe Bidenniñ memeleketi Qırımnıñ işğalini bir vaqıt tanımaycağı ile bağlı sözlerine cevap berdi. Rusiye prezidentiniñ matbuat kâtibi Dmitriy Peskov, «iç bir işğal yoq edi», dep ayttı. ​

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG