Ukrayina işğal etilgen topraqlarını tek küç yolunen azat etecek. Bunı Ukrayina Mudafaa nazirliginiñ Baş istihbarat idaresiniñ başı Kirill Budanov The Wall Street Journalına bildirdi.
Ukrayina istihbaratınıñ başı, Rusiye Donbasta, hususan Lugansk vilâyetindeki Popasna yaqınlarında "yavaş olsa da, amma devamlı" ilerilegenini bildirdi.
"Bazı yerlerde qazanacaqlar, bazı yerlerde mağlübiyetke öghraycaqlar. Amma bu asla müim degil, çünki soñunda Rusiye yutquzacaq, Ukrayina ise öz muvaqqat işğal etilgen topraqlarını qaytaracaq. O bunı küç yolunen, tek küç yolunen yapacaq, çünki başqa yol yoq", - dedi o.
General Budanovnıñ sözlerine köre, Rusiyeniñ eñ az bu yılnıñ soñuna qadar cenkni devam etmek içün resursları bar. Aynı zamanda, o, Vladimir Putin "tamamınen çıqılmaz vaziyette" olğanını saya.
"O, cenkni ne toqtata, ne de qaza bilmez. O, obyektiv sebeplerden ğalebe qazanıp olamaz. Onı toqtatmaq içün ise, o, Rusiye onı tasvir etmege tırışqanı kibi asla küçlü ve büyük devlet olmağanını qabul etmek kerek", - dey İstihbarat başı.
Budanovnıñ sözlerine köre, Rusiyeniñ yüksek arbiy ve istihbarat komandanlığınıñ tahminen 40 faizi Ukrayinadandır, bu sebepten de Moskvanıñ Ukaryina ükümeti, ordusı ve cemiyeti aqqında yeterli qadar malümatı bar edi. Aynı zamanda, o, Putin öz mesleatçılarınıñ daa orta variantlarnı red etip, fevralniñ 24-nde Ukrayinağa keniş mıqyaslı cenkni saylağanını ayta.
"Ruslarnıñ aqmaqlığı meni şaşırta. Cenk başlamazdan evel Putin bar olğan bütün variantlardan özü içün eñ yaramayını sayladı. Rusiye ekspertleri bu variant soñki ve oña muqaytlıqnen kelmek kerek olğanını defalarca ayttılar. Olarnıñ onıñ içün daa yahşı teklifleri bar edi. Şimdi neticeni köremiz", - dep fikir yürsete o.
Rusiyeniñ Ukrayinağa keniş mıqyaslı istilâsı başlamazdan evel Ukrayina akimiyetiniñ temsilcileri o zaman işğal etilgen Qırım, Donetsk ve Lugansk vilâyetleriniñ azat etilmesini yalıñız diplomatik yol ile körgenlerini defalarca bildirgen ediler.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
