Bugün saba Bağçasarayda ve Bağçasaray rayonında quvetçiler qırımtatarlarnıñ evinde tintüv keçirdi, dep haber ete "Qırım birdemligi".
Berilgen malümatqa köre, avgustnıñ 24-nde saba saat 4-te quvetçiler qırımtatarlarnıñ Ruslan Asanov, Seydamet Mustafayev, Remz Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirip başlağanlar.
Amethan Umerovnıñ evine kelgen Edem Semedlâyev Rusiye quvetçileri tintüv yerine onı yibermegenlerini bildirdi.
Haber etilgeni kibi, tintüvden soñ Mustafayev, Seytumerov, Nimetulayev ve Yakubovnı Aqmescit boyuncu Rusiye FSB idaresine alıp ketkenler.
Eldar Yakubovnıñ apayı yaqalav vaqtında Rusiye quvetçileri protokol oquğanını bildirdi. Oña köre aqayı RF Ceza Qanunnamesiniñ 205.5 maddesine binaen qabaatlana eken (terroristik teşkilâtnıñ teşkil etüv ve böyle teşkilâtnıñ faaliyetinde iştirak etüv).
Evel Qırımtatar resurs merkeziniñ başı Eskender Bariyev 2023 senesiñ 6 ayı içinde 37 tintüv, olardan 29 qıırmtatatrlarnıñ evinde qayd etilgeni bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
