Qırım işğali devamında Rusiye akimiyeti eñ az 2425 insannı yarımadadan quvdı. Bu aqta İnsan aqları regional merkeziniñ uquqçısı Vitaliy Nabuhotnıy yanvarniñ 31-nde Kyivdeki matbuat konferentsiyasında bildirdi, dep haber ete Qırım.Aqiqat mühbiri.
«2017 senesiniñ yazından 2018 senesiniñ yazına qadar çetel vatandaşları ve vatandaşlıqsız insanlarnıñ Qırımdan çıqarılmasınen bağlı işğalci mahkeme qararlarınıñ sistematik monitoringini keçirdik. Elde etken malümatımızğa köre, 2018 senesi yazğa qadar böyle insanlarnıñ sayısı eñ az 2425 oldı. Ne içün eñ az? Bazı mahkeme qararları qapalı edi», – dedi Nabuhotnıy.
Onıñ aytqanına köre, 1000-den ziyade çıqarılğan insan Ukraina vatandaşı ola, qalğanları – 37 dünya memleketiniñ vatandaşları ve vatandaşlıqsız insanlar.
Rusiye akimiyeti Ukraina uquqçısınıñ beyanatını şimdilik izaatlamay.
2018 senesi dekabr ayında haber etilgenine köre, Gaagadaki Halqara cinaiy mahkemeniñ prokuror ofisi işğal altındaki Qırım vaziyetini Ukraina ve Rusiye arasındaki halqara silâlı zıddiyet olaraq tanığan esabatnı derc etti.
Qırım Muhtar Cumhuriyetiniñ prokuraturası qayd etkenine köre, Ukraina aq qorçalayıcı teşkilâtlarnen beraber Halqara cinaiy mahkemege Rusiyeniñ Qırımda yapqan arbiy cinayetler aqqında malümat berdi. Laf insanlarnıñ çıqarılması, mabüslerniñ avuştırılması, mal-mülk aqlarınıñ bozuluvı, Qırımdaki Ukraina vatandaşlarınıñ Rusiye Silâlı quvetlerinde askerlik yapmağa zorlaması aqqında kete.
Yanvarniñ 31-nde QMC Prokuraturası ve Ukraina aq qorçalayıcıları Gaagadaki Halqara cinaiy mahkemege Ukraina vatandaşlarınıñ işğal etilgen Qırımdan qanunsız şekilde çıqarılmasına dair yañı deliller berdi.
