Rusiye işğal etken Qırım ve Donbastan memleket içinde köçip kelgenlerniñ balalarınıñ esas Ukrainanıñ mektepten evel müessiselerine ilk sırada kirmek aqqı bar.
Böyle deñişmeler Nazirler Şurasınıñ 2021 senesi yanvarniñ 27-nde qabul etken №86 qararına kirsetildi, dep haber ete Ukraina Reintegratsiya nazirliginiñ matbuat hızmeti.
«Reintegratsiya nazirliginiñ teşebbüsine köre, qayd etilgen Qararnen köçip kelgen insanlarnıñ balaları ve cenk areketleri ve silâlı zıddiyet neticesinde zarar körgen bala statusı olğanlar devlet ve kommunal mektepten evel müessiselerine ilk sırada alınacaq», – dep aytıla haberde.
Qayd etilgenine köre, mezkür deñişmeler mektepten evelki devlet ve kommunal müessiselerge balanı bermege tırışqan ve nevbet meselesinen qarşılaşqan köçip kelgen insanlarnıñ problemini al etmeli.
«Olarnıñ arasında kiçik balaları olğan yalıñız qadınlar bar, olarnıñ çalışması zorlaşa ya da imkânsız ola», – dep qoştı nazirlik.
Yanvar ayında haber etilgenine köre, Ukrainanıñ vaqtınca işğal etilgen topraqlarnıñ reintegratsiya meseleleri nazirligi vaqtınca işğal etilgen Qırım ve Donbasnıñ rayon sakinleri içün virtual cep telefon nomeralarını kirsetüv imkânlarını baqa.
