İyülniñ 30-nda içtimaiy ağlarda «Qırım – Ukrainadır» halqara kampaniyası keçirile. İnternet qullanıcıları #CrimeaIsUkraine heştegi ile yazı qaldıra.
Twitterde haber etilgenine köre, al-azırda bu içtimaiy ağda #CrimeaIsUkraine heştegi ile 4,5 biñ tvit derc etildi.
Twitlerni Ukrainanıñ dünyadaki diplomatik temsilcilikleri qaldıra.
Mında Ukraina Tış işler naziriniñ birinci muavini Emine Ceppar da mesacını derc etti.
Qırım Ukraina ola, yarımadada Rusiye insan aqlarını boza, qırımtatar halqını taqip ete, dep yazdı Britaniya parlamentiniñ azası Stewart McDonald.
Ukraina Tış işler nazirligi, iyülniñ 30-gde Büyük Britaniyalı Twitter qullanıcısı Aleks King başlatqan «Qırım – Ukrainadır» kampaniyasına qol tutmağa çağırdı.
İyülniñ 25-nde Ukraina Tış işler naziri Dmıtro Kuleba Moskvanıñ qanunsız Qırım işğalini normalleştirmek imkânını coydı, dep bildirdi. Bu aqta o, ABD devlet kâtibi Mike Pompeo tarafından Qırım ilhaqı qabul etilmegenine dair «Qırım qararı» ilân etilüviniñ ekinci yılı munasebetinen Twitterde yazdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
