İçtimaiy ağlarda "Zavjdı v sertsi" ("Daima yürekte") ukrain fleşmobı başlandı, teşkilâtçılar, Qırım aqqında ikâyeler ve hatıravlarnen paylaşmağa çağırta.
Bunı "Ukrinform" haber agentligine leyhanıñ teşkilcilerinden birisi, Gres Todorchuk agentliginiñ ortağı Oleksandr Todorçuk haber etti.
"Daima yürekte" leyhasınıñ maqsadı - yüregimizde olğan Qırım aqqında ikâyelerimiz ve hatırlavlarımız, vaqtınca ilhaq etilgen Qırımnı Ukrainanen bağlağanı köstermektedir. Öz leyhamıznen, Qırım mevzusı daima aktual olğanını köstermege isteymiz", - dedi Todorçuk.
Onıñ aytqanına köre, leyha, onlarce ukrainler Qırım aqqında hatırlavlarınen paylaşqan bir sıra videolarnen başlandı.
"Bu adiy adamlar, olar Ukrainanıñ em ğarbında, em şarqında yaşay. Olarnıñ arasında köçken adamlar, qırımatatarlar, yarımadada doğıp ösken adamlar bar. Anda balalaıqta barğan ve Qırım aqqında hatıraları qalğan adamlar bar. Köstermege istegenimizniñ esası - epimizniñ Qırımnen bağlı unikal ikâyemiz olğanını köstermektir", - dedi Todorçuk.
Leyha çerçivesinde "#завжди_у_серці" heşteginen içtimaiy ağlarda bir fleşmob başlandı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
