Ukrayina prezidenti Volodımır Zelenskıy aprelniñ 14-nde aqşam Rusiyeniñ tecavuzına qarşı küreşniñ 50-nci kününiñ yekünlerine dair muracaatında fevralniñ 24-nde keniş mıqyaslı istilânıñ birinci kününi hatırladı.
"Fevralniñ 24-nde maña aytılğanlarf aqlımda. Şu cümleden dünyanıñ eñ quvetlileri de. Doğrusını aytqanda, iç kimse dayanacağımızğa emin degil edi. Er kes sabır tiley edi. Çoqusı memleketni terk etmege teklif ete edi. Olar asılında zulumğa teslim olmağa tevsiye ete edi. Amma olar bizni bilmey edi. Olar ukrayinlerniñ ne qadar cesür olğanını, ne qadar serbestlikni sevgenini, istegenimiz kibi yaşamaq qabiliyetimizni bilmey edi", - dedi o.
Devlet başı Ukrayinanı desteklegen ve mudafaa içün kerek olğan er şeyni elde etmege yardım etken devletlerge ve liderlerge teşekkür etti.
"Bu 50 kün maña bir çoq dünya liderlerini farqlı şekilde kösterdi. Türlü devletler. Özü de pek zengi olmağalarnıñ cümertligini kördim. Dünya liderleriniñ adetince ciddiy qabul etmegenlerde azimkârlıq kördim. Demokratik dünyada azatlıqnı zulumnıñ ücüminden mudafaa etmek içün yeterli qadar iradesi olğanlarnı kördim. Siyasetçilerniñ quveti olmağnı kibi davranğanlarını kördim. Bu 50 kün devamında liderlik iddiasında olğan bazı devlet adamlarında daa çoq yapqan siyasetçi olmağanlarnı kördim", - dedi Zelenskıy.
Aynı zamanda, prezident qayd etti ki, halqara destek "yalıñız ukrayinlerniñ Ukrayinanı mudafaa etmesine ilâvedir". "Olar Rusiye tehnikasınıñ soñsuz qateriniñ ilerilemesini toqtattılar. Donbasta devamlı ücümlerni tuttılar. Muariupolni qaramancasına mudaafa etip, bütün devletimizge bu mudafaanen dayanmağa yardım ettiler. Cenüpten ücümni toqtattılar. Duşmannı şimalden quvdılar", - dep qayd etti prezident.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
