Human Rights Watch uquq qoruyıcı teşkilâtı, Qırım advokatı Emil Kurtbedinovnı imaye ete. Rusiye Adliye nazirligi onı “Qırım merkeziy advokatlar kollegiya”sından çıqarıp qoymaq istey.
“Şimdi Qırımda uquq qoruyıcılıqnen oğraşqan advokatlarnıñ azı çalışmağa azır. Yaqında Adliye nazirliginden advokat Emil Kurbedinovğa kelgen mektüp onıñ zenaatını telüke astına qoya ve rusiye akimiyeti keri çekilmeycegini köstere”, - denile teşkilâtnıñ beyanatında.
Vesiqada, evel Kurbedinov 2013 senesi Facebookta Hizb-ut Tahrir diniy teşkilâtınıñ körüşüvi aqqında paylaşqanları içün “ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi”nde qabaatlanıp 5 künge apiske alınğanı da añıldı.
Bu Ukrainada ruhset etilgen, amma Rusiyede yasaqlanğan teşkilât, Qırım ilhaqından soñ yarımada da yasaqlandı. Amma, uquq qoruyıcılar hatırlattı ki, 2017 senesi Kurbedinov bu yazı içün (amma başqa içtimaiy ağda derc etilgen) qabaatlanıp, 10 küngeapis etilgen edi.
İlk tevfiqten boşanğan soñ, 2017 senesi dekabr 25-te Rusiye Adliye Nazirligi, Emil Kurbedinov ve “Qırım merkeziy advokatlar kollegiya”sına, “ekstremist faaliyeti”nen bağlı olğanı içün onı martnıñ 1-inece kollegiyadan boşatmaq talabınen mektüp yolladı.
“Kurbedinov - bu kollegiyanıñ teşkilcilerinden birisi, ve bu mektüplerniñ maqsadı, şübesiz, onı advokatlıqtan marum qalmaq telükesini yaratıp, qorquzmaqtır. İşte, bu olarnıñ nevbetteki adımı ola bile”, - dey uquq qoruyıcılar. Olar, Kurbedinov - Qırımda eñ büyük advokat olğanını, siyasiy sebepli davalarda insan aqlarını imaye etkenini ayrıca köstere, böylece, “akimiyet onı taqip etkeni şaşırtıcı şey degil” dep aytıla vesiqada.
Rusiye Adalet nazirligi qırımlı advokat Emil Kurbedinovnı 2019 senesi martnıñ 1-ne qadar «Qırımnıñ merkeziy advokatlar kollegiyasından» çıqarmağa talap etti.
Kurbedinov Facebooktaki saifesinde bu malümatqa böyle cevap berdi: «Advokatlarğa qarşı basqı devam ete. Rusiyeniñ ekstremizm ve terrorizm saasındaki qanunları advokat ve faallernen küreşmek içün alet olaraq qullanıla».
Qırımlı advokat Emil Kurbedinovnı Rusiye uquq qoruyıcıları 2018 senesi dekabrniñ 6-nda tutıp aldı. Mahkeme onı 2013 senesi Facebookta paylaşqanları içün ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi sebebinden 5 künge apiske aldı. Kurbedinovnıñ zenaatdaşları dey ki, onı Suriye paytahtı Dimaşqqa köçken Qırım sakini şikâyet etti.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan «Hizb ut-Tahrir» teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
