İşğal etilgen Qırımda «Hizb ut-Tahrir» teşkilâtınen alâqaları içün taqip etilgen 122 Ukraina vatandaşından tek 8-i apisten çıqtı. Bu aqta KrımSOS talilcisi Yevğen Yaroşenko.
Onıñ aytqanına köre, 110 insan apiste yata, 3-ü ev apsinde buruna. Yaroşenko Remzi Memetov, Rustem Abiltarov ve Zevri Abseitovnıñ 9 yıldan soñ azat etilüvini izaatladı.
«Aman-aman 9 yıllıq apis cezasına baqmadan, Abiltarov, Abseitov ve Mamutov «Hizb ut-Tahrir davalarınıñ» diger mabüslerine köre daa az ceza aldı. Olarnı «Yarovayanıñ terrorğa qarşı paketi» qabul etilmezden evel tutqanlar, soñra terror teşkilâtınıñ faaliyetinde iştirak etüv içün (Rusiye Ceza kodeksiniñ 205.5 maddesiniñ 2-nci qısmı) apis cezası eki qat arttı – 5-10 yaşından 10-20 yaşına qadar», – dep qayd ete Yaroşenko.
«Bağçasaray rayonı Qırımda «Hizb ut-Tahrir» ile alâqalarından şübhelenüvnen bağlı tintüv ve tutuvlarnıñ sayısına köre birinci ola. İşğal yılları Bağçasaray rayonında 8 tintüv dalğası oldı, neticede 31 kişi Hizb ut-Tahrir ile alâqalarında qabaatlana», – dep qoştı talilci.
Qırımtatar resurs merkeziniñ malümatına köre, Rusiye Qırım yarımadasını qanunsız bir şekilde ilhaq etken soñ 370 qırımlınıñ siyasiy sebepli cinaiy taqibi qayd etildi, 228-i qırımtatarlarğa qarşı. Ukrayina Yuqarı Radasınıñ vekâletlisi Dmıtro Lubinets bildirgenine köre, al-azırda 218 qırımlı siyasiy ve diniy sebeplerden taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
