Cenübiy okrugınıñ arbiy mahkemesi (Rostov-na-Donu) Qırım sakinini Rusiyede yasaqlanğan «Hizb ut-Tahrir» teşkilâtınıñ faaliyetinde iştirak etkeni içün 4 yılğa üküm etildi. Bu aqta Rusiye kütleviy haber vastaları FSB idaresiniñ matbuat hızmetine esaslanıp bildire.
Mahküm 2015 senesi «Hizb ut-Tahrir» azası olğan eken. «Teşkilât iştirakçisi olıp, mabüs verbovka yaptı, Rusiye Federatsiyasınıñ akimiyetini zapt etmek ve anayasa qurumını deñiştirmek içün temel azırladı», – dep bildire FSB.
Rusiye uquq qoruyıcıları 2022 senesi avgust ayında erkekni tuttı. Olar mahküm qabaatını tanıdı ve prokurornen añlaşma tizdi, dep bildireler. Dava hususiy alda baqıldı.
Neticede mahkeme erkekni 4 yıl sert rejimli koloniyada qalmasına üküm etti, ilk 2 yılı apishanede keçecek. Rusiye uquq qoruyıcıları mahkeme ükmü aqqında resmiy şekilde bildirmedi.
Aprelniñ 13-nde Rusiye prokuraturası qırımtatar faali, «qırımlı musulmanlar davasınıñ» mabüsi Ernest Seytosmanov içün 18 yıl apis cezasını istedi.
Bundan evel Vlasihadaki istinaf arbiy mahkemesi «Hizb ut-Tahrir davasınıñ» mabüsi Vadim Bektemirovnıñ ükmüni deñiştirmeyip, 11 yıl sert rejimli koloniyada qalmasına üküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
