Rostov-na-Donu Cenübiy okrugınıñ arbiy mahkemesi musulman Aleksandr Sizikovnıñ dava malümatlarını Brayl elifbesine çevirmek içün prokurorğa qaytarmaq ricasını red etti. «Qırım birdemligi» cemaat birleşmesi advokat Lilâ Gemecige esaslanıp bildirgenine köre, mahkeme bu qararnı qabaatlav tarafından istinaftan soñ çıqardı.
«Birinci qurulış mahkemesi terrorizmden şübheli sayılğan 1-inci derece saqatı Aleksandr Sizikovnı cinaiy davasını prokurorğa qaytarmağa qarar berdi, çünki mabüske Brayl elifbesinde protsessual vesiqalar berilmedi. Vlasihada İstinaf arbiy mahkemesi bu qararnı lâğu etip, davanı Cenübiy okrugınıñ arbiy mahkemesine yañıdan baqıluvına yolladı», – dep aytıla haberde.
Dekabrniñ 9-nda olıp keçken oturışuvda imaye bir qaç muracaat, şu cümleden davanı prokurorğa qaytaruv ve cinaiy taqipni toqtatuv muracaatını berdi.
«Taraf terciman berilmeli ve vesiqalar qabaatlanğan kişi añlağan tildi – Brayl elifbesinde – berilmeli, dep bildirdi. Bugünki künge qadar Sizikov añlağan tilde bir vesiqa alamadı. Muracaatlardan birini Sizikov Brayl elifbesinde berdi. Bundan ğayrı, advokatlar gizli şaatlarnı aydınlatmağa ve farqlı şaatlıqlar sebebinden olarnen yüzleştirüv keçirmege rica etti», – dep haber etti faaller.
Mahkeme bütün muracaatlarnı red etti.
Sizikov Qırımdan video konferentsiya bağı vastasınen esnasta iştirak etecek.
Eñ yaqın toplaşuv dekabrniñ 22-ne planlaştırıldı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
