Rusiyede mahküm etilgen Aqmescitteki «Hizb ut-Tahrir davasınıñ» mabüsi Teymur Abdullayev 37 künden berli Salavatnıñ (Rusiye) İK-2 ceza izolâtorında tutula, bu sağlığına tesir ete.
Bu aqta «Qırım birdemligi» cemaat birleşmesi Abdullayevniñ advokat Emil Kurbedinovğa yazğan mektübine esaslanıp haber ete.
«İK-2 müessisesiniñ memuriyeti maña qarşı ayırım yapa, dep sayam, bunıñ formal bir sebebi yoq. Tutuv şaraitleri zor ve bular sağlığıma zarar ketire», – dep yazdı Abdullayev.
Mektüpte qırımlı koloniyanda tutulğan 516 kününden 426 kün ceza izolâtorında qala, dep bildirdi.
Daa evel berilgen malümatqa köre, Rusiyede mahküm etilgen Aqmescitteki «Hizb ut-Tahrir davasınıñ» mabüsi Teymur Abdullayevniñ SİZOda qaluv müddeti dekabrniñ 8-ne qadar uzatıldı.
Oktâbrniñ 24-nde Teymur Abdullayevniñ anası Dilâra Abdullayeva Facebook saifesinde oğlu kene ceza izolâtorına qapatıldı, dep bildirdi. Ukraina ombudsmanı Lüdmila Denisova Teymur Abdullayevniñ ceza izolâtorına qapatıluvını «işkence» dep adlandırdı.
Teymur Abdullayev bir yıldan ziyade Rusiyeniñ Salavat şeerindeki koloniyanıñ ceza izolâtorlarında tutuldı. Ceza izolâtorınıñ memuriyetiniñ versiyasına köre, o, tutuv rejimini muntazam tarzda bozğan. İyünniñ başında, advokatları ve tuvğanlarınıñ ğayreti sayesinde onı ŞİZO-dan çıqardılar.
Dilâra Abdullayeva iyülniñ 28-nde Kyivde Ukraina prezidentiniñ ofisi ögünde bir kişilik narazılıq aktsiyasını ötkerdi. O, başlıqlardan oğullarınıñ – Ukraina vatandaşlarınıñ azat etilmesi meselesinden ne iş körgenleri aqqında malümat bermege talap etti.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
