Apiske alınğan Aqmescitteki «Hizb ut-Tahrir davasınıñ» mabüsi Cemil Gafarov advokatı Rifat Yahinge sağlıq vaziyeti fenalaştı, dep haber etti.
«Qırım birdemliginiñ» Qırım.Aqiqatqa bildirgenine köre, SİZO tibbiy bölügi ve reberligi onıñ muracaatını körmemezlikke ura ve validoldan ğayrı tibbiy yardım köstermey.
Gafarov, onıñ büyrek hastalığı ileriley, dep tarif etti. Oña yardım etken yekâne şey – soy-sopları yollağan ilâclardır. O, dializ yapılmasa, «SİZOda yarım yıl bile dayanamaz», dep eminliknen ayta.
Rusiyeniñ Cezalarnı yerine ketirüv federal hızmeti Gafarov ve advokatınıñ aytqanlarını tefsir etmey.
2021 senesi iyül ayında Rostov-na-Donu apishane hastahanesinde bulunğan Cemil Gafarovnıñ sağlıq vaziyeti zayıflap başladı. Sentâbr ayında Rusiye mahkemesi Gafarovnıñ apis müddetini üç ayğa uzattı.
59 yaşında Cemil Gafarov 2019 senesi martnıñ 27-nden berli terrorizmden şübheli sayılıp, SİZOda buluna. Onı Rusiyede yasaqlanğan «Hizb ut-Tahrir» firqasında iştirak etkeninde qabaatladılar. Gafarov – ekinci derece saqatı, izolâtorda tutuluvı ayatı içün telüke taşıy. Gafarov 10 yıldan 20 yılğa qadar azatlıqtan marum etile bile.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
