Rostov-na-Donu (Rusiye) Cenübiy okrugınıñ arbiy mahkemesinde Aqmescitteki «Hizb ut-Tahrir davasınıñ» imaye şaatları sorğuğa çekildi. Advokat Edem Semedlâyevniñ malümatına köre, tarihiy ilimler namzeti, Ukraina Milliy ilimler akademiyasınıñ A.Krımskiy Şarqşınaslıq institutınıñ müdir muavini, üyken ilmiy hadimi Daniil Radivilov Qazan regionlarara ekspertiza merkezinde çalışqan Muhammed Zaripov keçirgen dinşınas ekspertizasını tenqit etip, «bir çoq hata olğanını» qayd etti.
Bu aqta Qırım.Aqiqatqa «Qırım birdemligi» cemaat birleşmesi haber etti.
«Din adamları, peyğamberler, islâm alimleriniñ adlarını bilecek ekspert hatalarnı tüzetmedi, stenogramma kibi oqup berdi, onıñ dinşınas ekspertizasınıñ seviyesi belli», – dep bildirdi Semedlâyev mustaqil mütehassısnıñ aytqanlarını .
Advokatnıñ birleşmege bildirgenine köre, hulâsa cinaiy dava malümatlarına qoşuldı.
«Mahkeme bu ihtarlarğa emiyet berip, bu insanlarnıñ davalarında terrorizmnen bağlı bir şey olmağanını añlaycağına ümüt etemiz», – dep qayd etti o.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
