Rusiye kontrolindeki Qırım Yuqarı mahkemesi siyasiy mabüsniñ anası Emine Abdulganiyevanı «Hizb ut-Tahrir davası» boyunca taqip etilgen oğluna qol tutmaq içün izinsiz narazılıq aktsiyasını keçirgeninde qabaatlap, 10 biñ ruble para cezasını deñiştirmedi. Bu aqta «Qırım birdemligi» haber ete.
«Qırım Cumhuriyeti Yuqarı şurasınıñ qadısı Oksana Şidakova istinaf şikâyetimizni qanaatlendirmedi. İmaye tarafı azırlağan deliller müvekkilimizniñ qabaatsız olğanını isbatladı», – dep izaatladı advokat Ayder Suleymanov.
Haber etilgenine köre, Emine Abdulganiyeva mahkeme qararlarını Avropa insan aqları mahkemesine şikâyet etmege planlaştıra.
Rusiye kontrolindeki Qırım Yuqarı mahkemesi daa evel bir kişilik narazılıqlarğa çıqqan qırımlılar Arsen Abhairov ve Rustem Emiruseinovnıñ anaları Zeliha ve Zureniñ istinaf şikâyetlerini red etti.
2020 senesi oktâbrniñ 31-nde Qurmandaki «Hizb ut-Tahrir davası» mabüsiniñ anası Zeliha Abhairova oğlu Arsenniñ taqip etilüvine qarşı bir kişilik narazılıq aktsiyasına çıqqan edi.
Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
