Qırımnıñ Rusiye memuriyeti yolbaşçısı Sergey Aksenovnıñ bildirgenine köre, yarımadada terror telükesiniñ seviyesi arta. Bunı o, Qırımnıñ terrorizmge qarşı komissiyasınıñ toplaşuvından soñ aydınlattı.
Onıñ aytqanına köre, eñ büyük telüke «Ukraina reberliginiñ regiondaki vaziyetni kerginleştirmek ıntıluvları qala».
«Diversion-terroristik planlarnı yerine ketirmek içün Ukraina mahsus hızmetleriniñ hadimleri qullanıla bile. Şu cümleden, Noman Çelebicihan göñülli batalyonına kirgen qırımlılar ve «Hizb ut-Tahrir» halqara terror teşkilâtınıñ azaları», – dep yazdı Aksenov Facebookta.
Qırımnıñ Rusiye yolbaşçısı dey ki, yarımadağa «halqara terror gruppalarnıñ erkânında tecribe qazanğan» qırımlılar qayta bile.
«Radikal islâmcı teşkilâtlar, mefküre ve ilimlerniñ tarafdarları ve azalarınıñ faaliyeti telükeli olması mümkün», – dep qayd etti Aksenov.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
