Rusiye uquq qoruyıcıları tarafından apiske alınğan qırımlılar Esma Nimetulayeva, Elviza Aliyeva, Nasibe Saidova ve Fevziye Osmanovanıñ ana-babaları Moskvağa Rusiye insan aqları vekâletlisinen körüşmege ketkende toqtatıldı ve beş buçuq saattann ziyade Hlevenskiy rayonındaki (Lipetsk vilâyeti) Rusiye İç işler bölügiinde tutuldı. Bu aqta “Qırım birdemligi” cemaat birleşmesi advokat ve soy-soplarınıñ malümatına esaslanıp haber ete.
Birinci tutuv bugün gece Rusiyeniñ Voronej vilâyetinde oldı. Qırımdan ketken eyyet 16 insandan ibaret: apiske alınğan qadın-qızlarnıñ ana-babaları, uquqçı Nazim Şeyhmambetov ve qırımtatar halqınıñ aqsaqalları.
Eyyetniñ birinci qısmı başta Boguçarskiy rayonındaki İç işler nazirliginiñ bölügine alıp ketirildi, digeri – daa bir polis bölügine. Saba saat 4-lerde – pasportlar teşkerilgen soñ episi yiberildi.
Saba saat 8:30-larda mikroavtobuslarnı kene yol-patrul hızmetiniñ hadimleri toqtattı – bu sefer Lipetsk vilâyetinde. Eyyet iştirakçilerinden biriniñ aytqanına köre, uquq qoruyıcılar “spetsnaz çağırıp, er kesni yerge yatqızacaq”, dep qorquzdı. Olar Hlevenskiy rayonındaki İç işler nazirligi bölügine ketmege talap ettiler.
“Siyasiy mabüs qadınlarnıñ qorantaları, aqsaqallar, uquqçı Şeyhmambetovnıñ qabaatı daa belli degil. Lâkin, eyyet iştirakçileriniñ aytqanına köre, er keske “ekstremizm teşkerüvi yapılacaq”, dep aytıldı”, – dep yaza “Qırım birdemligi”.
Rusiye insan aqları vekâletlisinen körüşmege ketkende tutulğan 16 qırımlınıñ tuvğanları Rusiye Baş prokuraturası ve Lipetsk vilâyetiniñ Hlevenskiy rayonınıñ prokuraturasına acele şikâyetler yolladı.
“Tutulğanlarınıñ sebebini bilmek ister edik, çünki olarğa aytılmadı, ve olar beş buçuq saattan berli qabaatsız ve ne olacağını añlamayıp anda buluna. Ana-babalarnıñ evge tez qaytmalarını ister edik”, – dep tarif etti apiske alınğan Nasibe Saidovanıñ ağası Hamza Ürinbayev.
Onıñ qayd etkenine köre, Rusiye İç işler nazirligine de muracaat etti, amma uquq qoruyıcılarnıñ cevabı olmadı.
Ürinbayev anda “acele tedbir almağa, qabaatlılarnı mesüliyetke çekmege ve serbest areket imkânını bermege” rica etip, yazma muracaatta bulundı ve ağzaviy şekilde prokuraturağa muracaat etti.
“Teşkerip baqacaqmız”, – dep ayttı Ürinbayevniñ muracaatına nevbetçi.
Oktâbrniñ 15-nde Rusiye uquq qoruyıcıları Qırımda dört qırımtatar qadınını tutıp, olarnı Rusiye Federatsiyası Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) “Hizb ut-Tahrir davası” boyunca qabaatladı.
Tutulğanlar arasında – Esma Nimetulayeva, beş balanıñ anası ve siyasiy mabüsniñ ömür arqadaşı; Nasibe Saidova, student, bala bağçasında çalışa; Elviza Aliyeva ve Fevziye Osmanova.
Oktâbrniñ 16-nda Rusiye kontrolindeki Aqmescitniñ Kiyev rayon mahkemesi dördüni de eki ayğa SİZOğa yolladı.
Oktâbrniñ 28-nde haber etilgenine köre, Qırımda Rusiye uquq qoruyıcıları tarafından tutulğan Elviza Aliyeva, Nasibe Saidova ve Fevziye Osmanovanıñ analarına apiste tutulğan qızlarına bir şey yollamağa izin berilmedi.
Rusiye kontrolindeki Qırım Yuqarı mahkemesi beş bala anası Esma Nimetulayeva, terbiyeci Nasibe Saidova, student Elviza Aliyeva ve iş adamı Fevziye Osmanovanıñ advokatlarınıñ istinaf şikâyetlerini red etip, qırımlılarnı apiste qaldırdı.
Aq qorçalayıcılar qayd etkenine köre, Qırımda qırımtatar qadın-qızlarına qarşı açılğan ilk Hizb ut-Tahrir davası oldı.
“Hizb-ut-Tahrir" teşkilâtı Rusiyede terror teşkilâtı olaraq tanıla, lâkin bir çoq memlekette yasaqlanmay.
