Cuma künü, oktâbrniñ 29-nda, Rostov-na-Donu Cenübiy okrugınıñ arbiy mahkemesi Qırımnıñ dört sakini – Bağçasaraydaki «Hizb ut-Tahrir davası» mabüsleriniñ ükmüni çıqardı.
Mahkeme olarnı «akimiyetni zorbalıq yolunen zapt etüv ıntıluvında" ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı. Advokatlar, ükümge qarşı istinaf şikâyetlerini berecek, dep bildirdi.
Rostovdaki Rusiye mahkemesiniñ binası ögünde sabadan kelgen onlarnen qırımlı toplaşıp, dava mabüslerini azat etmek çağıruvınen aktsiya keçirdi. «Qırım birdemligi» birleşmesiniñ malümatına köre, polis hadimleri insanlarnıñ «aktsiyanı toqtatmaq» içün 15 daqqası bar, aks alda areketleri Memuriy uquq bozuvları kodeksiniñ 20.2.2 maddesine köre tasnif etilecek, dep ayttı.
Aynı vaqıtta Aqmescitte Kreml kontrolindeki Qırım garnizon arbiy mahkemesiniñ binası ögünde Bağçasaraydaki «Hizb ut-Tahrir davasınıñ» mabüslerine qoltutmağa kelgen Qırım sakinleri toplaştı. Rusiye quvetçileri insanlarnı tutıp başladı. Eñ az 30 insan polis bölügine alındı. Aqmescitte vaqianı videoğa çıqarğan jurnalistler avtozakqa mindirildi.
Rostov-na-Donu Cenübiy okrugınıñ arbiy mahkemesinde seslendirilgen üküm ve «Hizb ut-Tahrir davasınıñ» mabüslerine qoltutmağa kelgen insanlar – bu fotoresimlerde.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Foto: Qırım birdemligi
Facebook Forum