Rostov-na-Donu Cenübiy okrugınıñ arbiy mahkemesi Aluştadaki «Hizb ut-Tahrir davasınıñ» mabüsi Lenur Halilovnıñ hastalığı sebebinden cumaaqşamı künü, iyünniñ 24-nde, olacaq taraflarnıñ munaqaşalarını başqa vaqıtqa qaldırdı. Bu aqta «Qırım birdemligi» cemaat birleşmesi advokat Refat Yunusnıñ malümatına esaslanıp haber ete.
Onıñ malümatına köre, 53 yaşında Lenur Halilovnıñ sıcağı çıqtı, ve o, iştirak etip olamadı.
«Feldşerler Halilovğa keskin nefes hastalığı diagnozını qoydı, amma koronavirus yuqunçı olmağanını tasdıqlamaq içün ekimler onı daa baqacaq», – dep haber ete «Qırım birdemligi».
Qayd etilgenine köre, Aluştadaki «Hizb ut-Tahrir davası» boyunca nevbetteki oturışuvnıñ keçirilüvi iyünniñ 28-ne planlaştırıla.
«Lenur Halilovnıñ sağlığı tüzelmese, mahkeme video bağını qurıp, taraflarnıñ munaqaşalarını başqa vaqıtqa qaldıracaq ve sıñırlav tedbirini uzatuv meselesini baqacaq», – dep qoştı faaller.
Hatırlatamız, Rostov-na-Donu Cenübiy okrugınıñ arbiy mahkemesinde iyünniñ 10-nda Aluştadaki «Hizb ut-Tahrir davası» oturışuvında taraflarnıñ munaqaşaları vaqtında Rusiye prokurorı mahküm etilgen qırımlılar içün 14 yıldan 19 yılğa qadar sert rejimli koloniyada qalmalarını istedi.
Qayd etilgenine köre, prokuror Lenur Halilovnıñ azatlığını 1 yıl ve 9 ayğa sıñırlap, 19 yıl apis cezasını, Ruslan Mesutovnıñ azatlığını 1 yıl ve 9 ayğa sıñırlap, 18 yıl apis cezasını, Ruslan Nagayevni 15 yılğa apiske alıp, azatlığını 1 yılğa sıñırlamağa, Eldar Kantimirovnıñ azatlığını 1 yılğa sıñırlap, 14 yıl apis cezasını bermege rica etti.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
