Bağçasaraydaki ekinci «Hizb ut-Tahrir işiniñ» iştirakçisi Ernes Ametov eki aydan berli Aqmescit SİZOsınıñ mahsus blokunda sanitariyasız şaraitlerde tutula.
Qırım.Aqiqat mühbiriniñ bildirgenine köre, bunı advokatı Ayder Azamatov sentâbrniñ 29-nda «Qırım birdemligi» cemaat birleşmesiniñ toplaşuvında aydınlattı.
«Menim fikirimce, o, (Ernes Ametov – QA) mahsus blokqa qanunsız ve sebepsiz avuştırıldı. Advokat olaraq SİZOğa muracaat etip, anda tutulmasınıñ sebebini añlatmağa talap ettim. Cevapları daa yoq», – dedi Azamatov.
Advokatnıñ malümatına köre, Ametov umumiy kameradan 3 metre kârelik odağa avuştırıldı, anda ışıq yoq sayıla bile, tek töşek, kenef ve aşayt malları içün dolap mevcut.
Azamatov, Ametov «antisanitariya ve bir insan içün kelişmegen şaraitlerde» tutulğanını qayd ete.
«Ernes qandalay ve furun böcekleri olğanını ayttı, şaraitler pek yaramay olğanını şikâyet etti. Pek azdı ve melül körüne», – dedi o.
Azamatovnıñ qayd etkenine köre, Bağçasaray gruppasına qarşı açılğan cinaiy iş ilk taqiqatta buluna, faqat soñki 3 aydan berli mabüslernen taqiqat tedbirleri keçirilmey.
«Ametovnıñ tevqif müddetini uzatmaq qararına (avgustnıñ 7-nde çıqarılğan – QA) qarşı bergen şikâyetim alâ daa baqılmadı. Artıq mahkemeler SİZOda tutuv müddeti yekünlengende şikâyet arizalarını baqmağa başlay», – dep qoştı advokat.
Bundan evel advokat ve mabüs uquq qoruyıcılar Ametovğa basqı yapıp, onı işbirligi yapmağa mecbur etmege tırışqanlarını tahmin etken edi.
Rusiye nezaretindeki Qırım Yuqarı mahkemesi avgustnıñ 10-nda Bağçasaraydaki «Hizb ut-Tahrir davasınıñ» üç mabüsi Ernes Ametov, Marlen Asanov ve Memet Belâlovnıñ tevqif müddetini uzatmaq qararına qarşı bergen şikâyet arizasını qanaatlendirmegen edi.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta. Amma bu maqsatqa irişmek içün terroristik usullar qullanğanını inkâr ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
