«Hizb ut-Tahrir davasınıñ» eki mabüsi Rustem Seytmemetov ve torunı Osman Seytumerov Qırımdan Rostov SİZOsına çıqarıldı. Bu aqta advokat Nazim Şeyhmambetov «Qırım birdemligine» bildirdi.
Onıñ aytqanına köre, davanıñ üçünci mabüsi Seytumer Seytumerovnıñ bulunğan yeri şimdilik belli degil. Faallerniñ malümatına köre, noyabrniñ 20-nde advokat Edem Semedlâyevniñ bildirgenine köre, apiske alınğan qırımlılar Aqmescit SİZOsından qomşu Rusiyeniñ Rostov-na-Donu şeerine yollanıldı.
Rusiye penitentsiar sisteması qırımlılarnıñ bulunğan yeri aqqında bildirmey.
2020 senesi noyabrniñ 5-nde Cenübiy okrugınıñ arbiy mahkemesinde Bağçasaraydaki üçünci «Hizb ut-Tahrir davası» boyunca ilk diñlevler oldı. Noyabrniñ 19-na ise davanıñ temeli baqılacaq ilk mahkeme olacaq edi. Faqat mabüsler ketirilmegeni içün mahkeme onı başqa künge qaldırdı.
Cenübiy okrugınıñ arbiy mahkemesi saytında oturışuvnıñ yañı künü aqqında haber etile – 2020 senesi dekabrniñ 17-si.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
