Rusiye FSİN hadimleri Boşkortostan cezahanesinde tutulğan "Hizb ut-Tahrir davası"nıñ mabüsi Teymur Abdullayevni daa 12 künge ŞİZO-da qaldırdılar. Bunı Teymurnıñ anası Dilâra Abdullayevağa atfı etip "Qırım birdemligi" haber ete.
Faallerniñ bildirgenine köre, tek bu yılnıñ küzünde Abdullayev eñ azından 6 kere ŞİZO-ğa oturtılğan edi. Bundan evel o izolâtorda oktâbrniñ 24-nden budunğan edi. Dilâ Abdullayevanıñ sözlerine köre, oğlu anda bir afta tutulğan soñ çıqqanınen birden kene keri yollandı.
"Oğluma qarşı ğarezli munasebet daa ne qadar vaqıt devam etecek, ne yaptı da cezahane müdiriyetiniñ hoşuna bu qadar ketmedi. Ukraina ve Rusiyeniñ uquq qoruyıcı teşkilâtları, buña qarşılıq köstergeniñizni isteyim - oğlum Teymur Abdullayevniñ ŞİZO-da böyle uzun müddet qalma faktını teşkeriñiz ve oğluma etilgen bi iskencelerni toqtatmağa yardım etiñiz", - dedi o.
Teymurnıñ ömür arqadaşı Alime Abdullayevanıñ aytqanına köre, cezahanede olğan müddet içinde sağlıq alı pek zayıflaşqan.
Onıñ bildirgenine köre, bu müddet kene uzatılacaq, çünki bunı FSİN hadimleri aytqan ve materiallar evelden azar olğanını bildirgenler. Onen beraber izolâtorda Yalta "Hizb ut-Tahrir davası"nıñ mabüsi Müslim Aliyev otura eken.
Oktâbrniñ 24-nde Teymur Abdullayevniñ anası Dilâra Abdullayeva oğlu kene ceza izolâtorına qapatılğanını bildirdi.
Apis cezasına mahküm etilgen «Hizb ut-Tahrir davası»nıñ mabüsi Teymur Abdullayev soñki ay içinde üçünci kere ceza izolâtorına yollandı.
Teymur Abdullayev bir yıldan ziyade Rusiyeniñ Salavat şeerindeki koloniyanıñ ceza izolâtorlarında tutuldı. Ceza izolâtorınıñ müdriyetiniñ versiyasına köre, o, tutuv rejimini muntazam tarzda bozğan. İyünniñ başında, advokatları ve tuvğanlarınıñ ğayreti sayesinde onı ŞİZO-dan çıqardılar.
Dilâra Abdullayeva iyülniñ 28-nde Kyivde Ukraina prezidentiniñ ofisi ögünde bir kişilik narazılıq aktsiyasını ötkerdi. O, başlıqlardan oğullarınıñ – Ukraina vatandaşlarınıñ azat etilmesi meselesinden ne iş körgenleri aqqında malümat bermege talap etti.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
