Link açıqlığı

Saatnıñ esas haberi

«Hizb ut-Tahrir davası» mabüsiniñ anasını oğluna qol tutuv aktsiyasını keçirgeni içün politsiyağa çağırğanlar – faaller


Venera Mustafayeva
Venera Mustafayeva

«Qırım birdemligi» cemaat birleşmesiniñ koordinatorlarından biri, Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ anası Venera Mustafayeva oğluna qol tutmaq içün keçirgen bir kişilik aktsiyası sebebinden Bağçasaray rayonındaki Rusiye İç işler nazirliginiñ bölügine çağırıldı.

«Qırım birdemligi» faalleriniñ malümatına köre, sentâbrniñ 22-nde Venera Mustafayeva advokatınen beraber politsiyanı ziyaret etmege niyetlene.

«Sentâbrniñ 5-nde bir kişilik narazılıq aktsiyasına çıqtım – oğlum Mustafayev Server olğan Bağçasaraydaki ekinci gruppa mabüsleri, qırımtatarlarğa çıqarılacaq ükümge qarşı narazılığımnı ve razı olmağanımnı bildirmege istedim. Oğlumnıñ ayatını nasıl yoq etkenlerine indemeyip baqıp olamayım. Anda turğan yarım saatım içinde yanıma bir uquq qoruyıcı kelmedi. Amma tünevin, bir afta keçken soñ, bizge politsiya keldi. Başta evge keldi, amma işte olğanım içün iş yerime keldi. Özüni tanıtıp, bugün saat 13:30 içün celpname berdi. Bu areketler narazılıq aktsiyamnen bağlı olğanını añlattı», – dep tarif etti Venera Mustafayeva.

Rusiye uquq qoruyıcıları bu celpnamenen bağlı resmiy malümat bermey.

Server Mustafayevniñ anası Bağçasarayda bir kişilik narazılıq aktsiyasına çıqqan edi. Qollarında yazuvlı şiar bar edi: «Camideki subetler – cinayet degildir! Oğlumnı qaytarıñız!».

Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.

Qırım Muhtar Cumhuriyeti ve Aqyar prokuraturası Bağçasaraydaki «Hizb ut-Tahrir davası» mabüslerine çıqarılğan ükümni Qırımdaki diniy taqiplerniñ daa bir delili dep saya.

Ukraina prezidenti Volodımır Zelenskıynıñ temsilciligi Bağçasaraydaki ekinci «Hizb ut-Tahrir davasınıñ» ükmüni «arbiy cinayet» dep adlandırdı. Reintegratsiya nazirligi, qırımtatarlarğa qarşı çıqarılğan üküm sebebinden Rusiyege qarşı sanktsiyalarnı sertleştirmege talap etecek, dep bildirdi.

2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.

«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG