Ukraina konsulı Yuriy Dovgulâ Rostov vilâyetiniñ (Rusiye) Novoçerkassk SİZO-3-nde Qarasuvbazardaki «Hizb ut-Tahrir davasınıñ» mabüslerinen körüşip, birine ameliyat yapılmalı, dep bildirdi.
Bu aqta o, «Qırım birdemligi» cemaat birleşmesine ayttı.
«Noyabrniñ 9-nda 60 yaşını toldurğan Enver Ömerov keskin hronik hastalığı içün ameliyatqa muhtac. Baş konsullıq Rostov vilâyetindeki Cezalarnı yerine ketirüv federal hızmetiniñ baş idaresine ameliyatnen bağlı muracaat etmege niyetlene. Şimdi o, eki kişilik kamerada buluna, ibadet etmege imkânı bar», – dep bildirdi faaller.
Diger qırımlı mabüs Ayder Capparov konsulğa koronavirustan soñ nefes problemleri ve aqcigerde ağrılar bar, dep haber etti. Bundan ğayrı, yüksen qan basımı bar. O, 10 kişilik kamerada buluna.
Konsulnıñ malümatına köre, davanıñ üçünci mabüsi Riza Ömerov tek tiş ekiminiñ yardımına muhtac, diger mabüsler de öyle. Sağlığı bir qarar. Onı 5 kişilik kamerağa aldılar, anda Qurmandaki «Hizb ut-Tahrir davasınıñ» qırımtatar mabüsi Arsen Abhairov da tutula.
«Mabüslerniñ SİZO-3 memuriyetine bergen muracaatlar esasen turmuş problemlerinen bağlı: dımlılıq, suv aqsavları, saç qırqmaq ve tıraş olmaq içün imkân yoq, eşyaları kamerada keçirilgen tintüv vaqtında alındı ve saiplerine qaytarılmadı. Siyasiy mabüsler kezintiler az ve aşta domuz eti bar, dep tarif etti. Onı er vaqıt bermeyler, amma aftada eki kere bereler. Kameralarda buzdolabı yoq. Aftada tek bir kere yuvunmaq mümkün», – dep bildirdi «Qırım birdemligi».
Sentâbr ayında berilgen malümatqa köre, qırımlı advokatlar Novoçerkassk SİZOsınıñ mabüsleri tutulğan şaraitlernen bağlı şikâyetler yazdı. Lâkin Cezalarnı yerine ketirüv federal hızmeti, Rostov cemaat nezaret komissiyasınıñ vekilleri ve Rostov vilâyetiniñ prokuraturası öyle de cevap bermediler.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
