İmaye Rusiyeniñ Vlasiha şeerindeki İstinaf arbiy mahkemesinde Bağçasaraydaki «Hizb ut-Tahrir davasınıñ» mabüsleri – vatandaş jurnalisti Amet Suleymanov, Rustem Seytmemetov, tuvğan ağa-qardaş Seytumer ve Osman Seytumerovlarnıñ ükmüni şikâyet etecek. Bu aqta advokat Nazim Şeyhmambetov bildirdi, dep haber ete «Qırım birdemligi» cemaat birleşmesi.
«Ükümni adaletsiz dep sayamız, çünki müvekkillerimizniñ cemaat telükesizligi, Rusiye Federatsiyasınıñ devleti ya da anayasa qurumına havf ketirecek olaraq tasnif etile bilgen bir areket yapqanları isbatlanmadı – yani Rusiye Federatsiyasında akimiyetni küçnen zapt etüv terror areketleri olmadı», – dep qayd etti Şeyhmambetov.
Onıñ bildirgenine köre, qabaatlav qullanğan esas delillerden biri Bağçasaray camisinde yapılğan ses qaydı oldı. Anda diniy, siyasiy ve tarihiy mevzular muzakere etile. Hususan, Qıyamet künü ve tahminen 8 biñ bosnalı musulman kütleviy şekilde öldürilgen Srebrenitsadaki qıyır-çıyır aqqında aytıla.
Rostov-na-Donu Cenübiy okrugınıñ arbiy mahkemesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
