Link açıqlığı

Saatnıñ esas haberi

Denisova «Hizb ut-Tahrir davası» mabüsiniñ anası bergen istinafqa mahkemeniñ red qararına cevap berdi


Lüdmila Denisova
Lüdmila Denisova

Ukraina ombudsmanı Lüdmila Denisova Rusiye kontrolindeki Qırım Yuqarı mahkemesiniñ siyasiy mabüsniñ anası Emine Abdulganiyevağa oğluna qol tutmaq içün keçirgen bir kişilik narazılıq aktsiyasına içün berilgen 10 biñ ruble para cezası qararını deñiştirmemek qararına cevap berdi.

«Rusiye taqip etmege ve vaqtınca işğal etilgen Qırım sakinleriniñ vatandaş faalligini bastırmağa devam ete. İşğalci memleket İnsan aqları ve esas serbestliklerini qoruv şartnamesiniñ 11-inci maddesi, İnsan aqları beyannamesiniñ 20-nci maddesi ve Vatandaş ve siyasiy aqlarınıñ halqara añlaşmasınıñ 21-inci maddesine köre qırımtatarlarnıñ serbest barışıq toplaşuv aqlarını boza», – dep yazdı Denisova Facebook saifesinde.

Denisova halqara toplulıqnı «Rusiyede qanunsız tutulğan Ukraina vatandaşlarınıñ taqdirine lâqayt olmağanını ve olarnı azat ettirmek içün basqı yapıluvını toqtatmağanını köstermesine» çağırdı.

Hatırlatamız, avgustnıñ 2-nde Rusiye kontrolindeki Qırım Yuqarı mahkemesi Qurmandaki «Hizb ut-Tahrir davasınıñ» mabüsi Eskender Abdulganiyevniñ anası Emine Abdulganiyevanıñ istinaf şikâyetini red etip, oğluna bir kişilik narazılıq aktsiyası sebebinden berilgen 10 biñ ruble para cezasını deñiştirmedi.

Rusiye kontrolindeki Qırım Yuqarı mahkemesi daa evel bir kişilik narazılıqlarğa çıqqan qırımlılar Arsen Abhairov ve Rustem Emiruseinovnıñ anaları Zeliha ve Zureniñ istinaf şikâyetlerini red etti.

2020 senesi oktâbrniñ 31-nde Qurmandaki «Hizb ut-Tahrir davası» mabüsiniñ anası Zeliha Abhairova oğlu Arsenniñ taqip etilüvine qarşı bir kişilik narazılıq aktsiyasına çıqqan edi.

Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG