Qırımtatar faali, «Bağçasaraydaki ekinci «Hizb ut-Tahrir davasınıñ» mabüsi Server Zekiryayev bir aydan berli Tula vilâyetiniñ ceza izolâtorında tutula. Bu aqta ömür arqadaşı Zarema «Qırım birdemligi» cemaat teşkilâtına bildirdi.
Fevralniñ 5-nde aqayından koloniya memuriyeti onı 15 künge ceza izolâtorına qapatqanına dair mektüp aldı. «Zarema Zekiryayev daa bir elektron mektüp aldı, aqayı ceza müddeti arttırılğanını haber etti», – dep bildirdi teşkilât, siyasiy mabüs izolâtordan çıqmağanını qoşıp.
Uquqçı Lilâ Gemeci qayd etkenine köre, siyasiy mabüsni ceza izolâtorında tutmaq içün bir sebep yoq. Onıñ aytqanına köre, bu tek basqı degil, işkence de ola, çünki berilgen aşlar Zekiryayevniñ diniy baqışlarına zıt kele, o, aç qalmağa mecbur.
«Aftada tek eki kere tuvar eti berile. Qalğan künleri domuz eti berile. Elektron mektüplernen yazışamız. Telefon etmek içün ariza yazdı, amma izin bermediler», – dep tarif etti Zarema.
2017 senesi oktâbr ayında Rusiye uquq qoruyıcıları altı Bağçasaray sakinini tututı. Timur İbragimov, Marlen Asanov, Memet Belâlov, Seyran Saliyev, Server Zekiryayev i Ernes Ametov. Rusiye FSBsi olarnı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkenlerinde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahmekesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
