Qırım işğaliniñ aman-aman 10 yılı devamında «Hizb ut-Tahrir davasınen» alâqası bar manaçığınen 107 qırımlı taqip etildi, çoqusı – qırımtatarıdır. Bu aqta «KrımSOS» talilcisi Yevğen Yaroşenko bildirdi.
Aq qorçalayıcılar bildirgenine köre, faallerge tintüv vaqtında gizliden kitap qoyula, din ve siyaset mevzularında subetleri gizli-gizli qayd etile (olarnı FSBnen sıqı bağlı ekspertler yaza) ve mahkemede aydınlatılmağan «gizli şaatlar» celp etile.
«KrımSOS» malümaına köre, apishane coğrafiyası arta: apiske alınğanlar Rusiyeniñ Başqortostan, Şimaliy Kavkaz, Priuralye, Çelâbinsk vilâyeti ve Krasnoyarsk ülkesine çıqarıla.
Yaroşenko taqip etilgen beş gruppanı qayd etti:
- Ukrayına tarafdarı faaller ve mustaqil jurnalistler;
- qırımtatar faalleri (olarnı diniy baqışlarından taqip eteler);
- aq qorçalayıcılar ve cemaat faalleri (aralarında «Qırım birdemliginiñ» faalleri de bar)
- işğal etilgen topraqlarda cenkke qarşı çıqqan vatandaşlar ve qırımtatarlar;
- mustaqil advokatlar.
Qırımtatar resurs merkeziniñ yolbaşçısı Eskender Bariyev 2023 senesi Qırımda aq qorçalayıcılar 173 tutuv, 65 tintüv, 217 apis cezası, 186 sorğu ve aman-aman 300 adaletli mahkeme aqqınıñ bozuluvını ve 50-den çoq sağlıq aqqı bozuluvını qayd etti, dep bildirdi.
Ukrayına prezidentiniñ Qırım Muhtar Cumhuriyetindeki daimiy temsilciligi bildirgenine köre, 2023 senesi dekabr ayınıñ soñunda 191 Qırım sakini siyasiy sebeplerden azatlıqtan marum etildi, 123-ü qırımtatarı ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
