Rusiye polisiniñ hadimleri mayısnıñ 18-nde Rostov mahkemesiniñ Bağçasaraydaki «Hizb ut-Tahrir davasınıñ» (dördünci gruppa) mabüslerine qarşı oturışuvı ile video konferentsiya bağı olğan Aqmescitteki mahkeme binası ögünde bulunmağa yasaqladı.
«Qırım birdemligi» birleşmesiniñ videosında polis hadimleri mahkeme binasınıñ azbarını terk etmege talap etip, «mında oquv yurtu bar, şunıñ içün yabancılar kirip olamay», dep ayta.
Polis hadimi keçenleri mektep talebeleri ve hadimleriniñ ölümine ketirgen Kazan mektebindeki facia sebebinden terror telükesine yol bermemek içün tedbir alına, dep bildirdi.
Rusiye kontrolindeki Qırım garnizon arbiy mahkemesi Qırım müendislik pedagogika universitetiniñ yanında yerleşe.
Mahkeme ögünde toplaşqan diñleyciler polis talabınen mahkeme ögünden ketmege mecbur oldı.
Bugün Ukraina ve dünyada qırımtatar halqı genotsidiniñ qurbanları añıla. Qırımnıñ farqlı şeer ve rayonlarında qırımtatar halqı genotsidiniñ qurbanları hatırasına tedbirler keçirile. Mayısnıñ 18-i arfesinde qırımtatar faallerini polis tenbiledi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
